பி.எஸ்.ஜி. ஸ்போர்ட்ஸ் கிளப் சார்பில் ஆண்கள் அகில இந்திய அளவிலான கூடைப்பந்து போட்டிகள் கோவை பீளமேட்டில் உள்ள பி.எஸ்.ஜி டெக் உள்விளையாட்டு அரங்கத்தில் நடைபெற்று வந்தது. இதில் அகில இந்திய அளவில் மிகச்சிறந்த 8 அணிகளான இந்திய கப்பல் படை அணி, பேங்க் ஆஃப் பரோடா அணி, இந்திய இராணுவ அணி, இந்தியன் வங்கி அணி, வருமாண வரி துறை அணி, சுங்க வரி அணி, கேரளா மாநில மின்சார வாரிய அணி மற்றும் கேரளா போலீஸ் ஆகிய அணிகள் கலந்து கொண்டன.
போட்டிகள் முதல் மூன்று நாட்கள் சூழல் முறையில் நடைபெற்றது. கடைசி இரண்டு நாட்கள் நாக்அவுட் முறையில் நடைபெற்றது. இன்று நடைபெற்ற இறுதிப்போட்டியில் சென்னை – வருமான வரி அணியை எதிர்த்து புது டெல்லி – இந்திய ராணுவ அணி விளையாடியது. இதில் வருமான வரி அணி 75 – 71 என்ற புள்ளிகணக்கில் வெற்றிபெற்று கோப்பையை தட்டிச்சென்றது. முன்னதாக நடைபெற்ற மூன்று மற்றும் நான்காம் இடங்களுக்கான போட்டியில் லோனாவாலா – இந்திய கப்பல் படை அணியை எதிர்த்து சென்னை – இந்தியன் வங்கி அணி விளையாடியது. இதில் இந்தியன் வங்கி அணி 79 – 72 என்ற புள்ளிகணக்கில் வெற்றிபெற்று மூன்றாவது இடத்தை பிடித்தது. போட்டிகளை தொடர்ந்து வெற்றிபெற்ற அணிகளுக்கு பரிசளிப்பு விழா நடைபெற்றது.
இதில் சிறப்பு விருந்தினராக கோவை மாநகர காவல் துறை ஆணையாளர் திரு. வி. பாலகிருஷ்ணன் கலந்து கொண்டு பரிசுகளை வழங்கினார். மேலும் விழாவிற்கு பிஎஸ்ஜி கல்வி நிறுவனங்களின் நிர்வாக அறங்காவலர் திரு. எல். கோபால கிருஷ்ணன் முன்னிலை வகித்தார். மேலும் விழாவில் அகில இந்திய கூடைப்பந்து சம்மேளனம் துணைத் தலைவர் மற்றும் டெக்னிக்கல் கமிட்டி தலைவர் திரு. நார்மன் ஐசக் மற்றும் தமிழ்நாடு கூடைப்பந்து கழக துணைத் தலைவர் திரு. பாலா ஆகியோர் கலந்து கொண்டனர். இறுதிப் போட்டியில் வெற்றி பெற்ற வருமான வரி அணிக்கு முதல் பரிசாக ரூ. 1 லட்சம் மற்றும் பிஎஸ்ஜி சுழல் கோப்பையும், இரண்டாம் இடம் பெற்ற இந்திய ராணுவ அணிக்கு பரிசாக ரூ. 50 ஆயிரம் மற்றும் கோப்பையும், மூன்றாம் இடம் பெற்ற சென்னை இந்தியன் வங்கி அணிக்கு ரூ. 20 ஆயிரம் மற்றும் நான்காம் இடம் பெற்ற லோனாவாலா – இந்திய கப்பல் படை அணிக்கு ரூ. 15 ஆயிரம் மற்றும் சிறந்த விளையாட்டு வீரர் வருமான வரி அணியின் அரவிந்த் அண்ணாதுரைக்கு ரூ. 10 ஆயிரம் பரிசாக வழங்கப்பட்டது.
